Sannkristnu lesendur.

Oft var þörf en nú er nauðsynlegt að stíga inn í þjóðfélagsumræðuna með kristilegan boðskap og upplífgandi fræðsluefni. Þjóðkirkjan, Biskupsstofa og Klerkaráð Costco fór þess á leit við mig að halda á lofti kristnum gildum nú þegar Hvítasunnan og opnun Costco er að baki og tiltölulega langt í næstu stóru trúarhátíð. Í Svarfaðardal er talað um fjórar stórhátíðir á almannaksárinu; jól, páska, göngur og þorrablót. Hjá Þjóðkirkjunni tala menn um jól, páska, Hvítasunnu og kirkjuþing. Eða mig minnir það allavega. Hefur þjóð vor gleymt sínum helstu kristnu gildum? Leyf mér að hugsa…..JÁ. Ég er voðalega hræddur um að svo sé.

Í upphafi skapaði Guð himin og jörð. Síðan þá hefur mikið vatn runnið til sjávar. Að minnsta kosti eftir að Guð skapaði sjóinn. Sífellt meira vatn rennur nú til sjávar eftir því sem ís og jöklar bráðna hraðar og hraðar. Vatnsyfirborðið hækkar og hækkar og gleðistundunum fækkar og fækkar. Á endanum verður auðvitað allt komið á bólakaf – líka Einar Haf. Eða sjór. Einar Hafsjór af fróðleik. Ætli hlýnun jarðar verði ekki til þess að Kolbeinsey hverfi endanlega af yfirborðinu? Ætli hlýnun jarðar verði ekki til þess að plágur og hungursneyðar stigmagnist? Ætli hlýnun jarðar verði ekki til þess að ég svitni enn meira? Og hvað verður um svitann sem flæðir? Rennur hann ekki til sjávar? Við vitum jú hvað það þýðir. Ég er strax byrjaður að svitna. Upphaf endalokanna er…..hafið. Vá hvað þetta var djúp efnisgrein. Rétt eins og hafið.

Það þarf auðvitað ekki að taka það fram að sóknarbörn í Urðasókn þurfa enga kristilega uppfræðslu. Það er nóg að kirkjuklukkunum í Urðakirkju sé hringt í hagstæðri vindátt og þá svífur heilagur andi yfir allri sókninni eins og hún leggur sig. Því miður þarf meira átak til að hið snjalltækjasýrða neysluþjóðfélag dagsins í dag taki sönsum. Ég minni samt á að það er tilboð á syndaaflausnum alla fimmtudaga milli kl. 13 og 16 með Jesúappinu og þá fást altaristöflur á góðum kjörum alla laugardaga – ódýrari en í Costco.

Dónald Trömp forseti Bandaríkjanna hefur ekki áhuga á hinu svokallaða Parísarsamkomulagi, sem skuldbatt flestar þjóðir heims til að draga úr losun gróðurhúsalofttegunda. Aumingja vesalings Bandaríkjamennirnir ætla sér að verða frábærir aftur, hvað svo sem það kann að þýða fyrir jörðina okkar. Íslendingar ætla sér að feta í þessi fótspor sama hvað einhverju samkomulagi stóru strákanna í útlöndum líður. Hér verður allt gefið í botn í eyðslunni nú í góðærinu. Flugferðum og skipaflutningum verður fjölgað, innflutningur verður aukinn enn frekar – helst á baneitruðum kolum og sjaldgæfum málmum – og eins miklu plasti og spilliefnum fleygt í sjóinn og hægt er. Við þurfum jú að halda dampi og megum ekki glutra þessu góða skriði niður sem þjóðarskútan er nú komin á. Kristin gildi? Iss piss, síðan hvenær hafa þau skilað einhverju í verslun og viðskiptum. Er þetta góðærisfnykur í loftinu? Þyrstir ykkur af gullsnúðunum? Hérna, fáið ykkur góðæriskoffí. Gjörið svo vel.

Hvorki Guð, Jesús né heilagur andi voru hafðir með í ráðum þegar Landsréttur var búinn til nýverið. Dómsmálaráðherra sá um þann verknað nánast ein og óstudd. Dómsmálaráðherra fékk hæfnisnefnd við hæfi til að velja hæfa umsækjendur sem mögulega gætu átt áhyggjulaust hæfikvöld – en ráðherra þótti umsækjendurnir því miður ekki hæfa starfinu og ákvað því að stokka spilin upp á nýtt og troða öllum efa og semingi öfugt ofan í kokið á alþingi. Auðvitað spiluðu kynjasjónarmið þarna inn í enda þarf orðið að kynjasamþætta alla skapaða hluti svo enginn fari í fýlu. Strákur-stelpa-strákur-stelpa. Það er kynjasamþætting. Svo er auðvitað hægt að ganga lengra og fara fram á kinnasamþættingu en til að losna við rauða sjónvarpsmerkið uppi í hægra horninu verður ekki farið nánar út í það hér. Af Landsrétti er það að segja að allir fimmtán dómararnir lifðu saman í sátt, kynjasamþættingu og samlyndi til hæfiloka.

Til að leiðrétta allan misskilning fer hátíð Einar Hafsins fram nú á sunnudaginn. Verið velkomin.

Hin kristnu gildi gleymast senn
og Guð sá sem hér eitt sinn bjó
upprennandi ungir menn
sækja í sig veðrið enn
og kaupa gullkálf í Costco.

Þess má til gamans geta að ég er svo feitur að ég heiti fleirtölunafni. Það gengur bara betur næst.

Einar, já alveg einar. Karlgreyið.

Tilvitnun dagsins:
Allir: DÍSES KRÆST!!!