Góðir tilheyrendur.

Jú það líður að jólum. Reyndar hefur liðið að jólum alveg síðan síðustu jólum lauk. Nú líður samt virkilega að jólum. Jólaösin nær senn hámarki og jólasveinarnir koma til byggða einn af öðrum. Minn maður Gluggagægir kom í nótt sem leið. Það er minn uppáhalds jólasveinn og við eigum reyndar ýmislegt sameiginlegt….en það er önnur saga. Ég veit að það eru margar margar vikur síðan hinir svokölluðu jólasveinar létu fyrst á sér kræla í mannabyggðum, en með stífri rannsóknarblaðamennsku og uppljóstrunum opinberra rannsóknaraðila tókst auðvitað að sýna fram á hvers lags loddarar og gervijólasveinar væru þar á ferð, drifnir áfram af gróðasjúkum verslunarmönnum. Þrátt fyrir þennan augljósa blekkingarvef hef ég hvergi heyrt minnst á það í fréttum að Neytendastofa hyggist fara fram á að jólasveinamerkingar verði teknar af neytendaumbúðum í ljósi þess að engin stofnun getur vottað það að um alvöru jólasveina sé að ræða. Þarna er einfaldlega verið að blekkja neytendur…en það er greinilega ekki sama hver á í hlut í þeim efnum.

Nú á aðventunni eiga tilhleypingar í fjárhúsum landsmanna sér stað. Jólin þín byrja ekki í IKEA. Þau byrja kannski pínu þegar IKEA geitin brennur en þau byrja fyrir alvöru í fjárhúsunum. Kindakynlífið er komið á fullt skrið með tilheyrandi bægslagangi og fjárdrætti. Nú er svo komið að fjölmargir fjárbændur láta sæða ærnar sínar með verðlaunuðum hrútafyrirsætum og sæðisgjöfum sem lesa má mærðaryrði um í hinni árlegu hrútaskrá. Hvers eiga heimahrútarnir að gjalda? Þeir þurfa að horfa upp á þetta. Hvernig þætti húsbændum það ef eiginkonurnar yrðu sæddar með verðlaunafyrirsætum og sæðisgjöfum sem lesa má mærðaryrði um í hinni árlegu hrútaskrá. Nei bíddu við, þetta er alls ekki raunhæft dæmi. Hvað þá sambærilegt. O jæja. Ég dreg þetta til baka.

Af hverju er ég annars að nefna þetta? Jú var það ekki einmitt í fjárhúsi á Betlehemsvöllum sem Jesúbarnið kom í heiminn? Og það á miðjum fengitímanum. María og Jósep létu kindakynlífið ekkert á sig fá heldur gekk fæðing frelsarans hratt og vel fyrir sig. Kindurnar létu þetta heldur ekkert á sig fá og ég veit ekki betur en að sauðburður í Betlehem vorið eftir hafi gengið samkvæmt áætlun.

Þegar vetrarveðrin geysa í desember verður manni einmitt hugsað til þess hvernig þetta hafi nú allt saman verið þarna í fyrndinni þegar samgöngur voru mun frumstæðari en nú er og fólk þurfti á milli staða í hvaða veðri sem var. María og Jósep gátu til að mynda ekki reitt sig á björgunarsveitir, snjóbíla eða vélsleða þegar þau börðust í vetrarstórhríðinni milli skafla þarna í eyðimörkinni um árið í leit að gistihúsi. Ekki var gönguskónum eða kraftgöllunum fyrir að fara. Hvað þá vegahandbók eða ferðamannabæklingum þar sem helstu gististaðir eru auglýstir. Nei, aldeilis ekki. Þá þurfti fólk að treysta á hyggjuvitið.

Og auðvitað var það þannig að María og Jósep enduðu í fjárhúsinu þar sem þau fengu ekkert herbergi til leigu í gistihúsi þar sem allt var uppbókað. Þar höfðu auðvitað forgang sterkefnaðir ferðamenn frá austurlöndum fjær sem komu í hundruða þúsunda tali í svokallaðar norðurljósaferðir og tepptu öll gistipláss, ferðamannastaði og viðkvæmar náttúruperlur. Það má því vera ljóst að vandi ferðamannaiðnaðarins er ekki nýr af nálinni.

Nú er hann kominn, jólasnjórinn. Sá sem veðurfræðingar og mokstursmenn höfðu beðið eftir með öndina í hálsinum. Einmitt. En hvernig verður veðrið á austurlandi? Ég veit það ekki, ég sá bara veðurfræðingsrass í vindi – og sá er úfinn.

Í dag var stysti dagur ársins. Guði sé lof segja sumir, enda á ég afmæli í dag. Og hvernig þakka ég fyrir þær kveðjur og árnaðaróskir sem mér hafa borist? Einmitt svona.

Hátíð blíð nú kemur brátt
björt er stjarna á himni hátt
skín ei lengur sólin.
Krakkar rjóðir syngja kátt
kaupmenn hlæja í búðum dátt
hvenær koma kakan mín og jólin?

Emm…eitthvað fór nú á milli mála þarna. Drykkjarmála…og allt sullast út um allt.

Þess má til gamans geta að algjör samstaða náðist um það í viðskipta- og efnahagsnefnd Alþingis að forgangsraða í þágu bloggsíðu Einars Haf á kostnað heilbrigðiskerfisins – enda mun ódýrara í framkvæmd. Ofan á allt sparar lestur bloggsíðunnar hundruði þúsunda króna árlega í svefnlyfjakostnað.

Um leið og ég þakka fyrir allar afmæliskveðjurnar óska ég ykkur „öllum“ gleðilegra jóla. Áramótaávarp bloggsíðu Einars Haf er í nefnd – hugsanlega tekst að birta ávarpið opinberlega áður en árið rennur sitt skeið – það verður „spennandi“ að fylgjast með því.

Einar ári eldri.

Tilvitnun dagsins:
Allir: Útsala!

Kærkomnu lesendur.

Skilgreiningin á því að eitthvað falli í grýttan jarðveg? Jú, það er þegar Einar Haf skrifar bloggfærslu og birtir opinberlega og það sem gerist svo í beinu framhaldi. Vitið þið bara til. Það mun án efa gerast núna líka. Hefði þessi inngangur ekki mátt vera aðeins lengri? Æi ég veit það ekki.

Nú hefur það komið upp úr kafinu, dúrnum og kjörkössunum að Donald Trump er næsti forseti Bandaríkjanna. Eftirnafn hans rímar við prump – og eflaust er það ekki af ástæðulausu. Ég ætla ekki að tjá mig neitt frekar um það hvort Donald sé hrokafull karlremba sem hlakkar til þess eins að komast í kjarnorkuvopnabúrið…eður ei. Það eina sem ég veit er að maðurinn er ekki bara með appelsínuhúð heldur er hann bókstaflega appelsínugulur á litinn. Svo hefur hann gaman af að horfa á og dæma konur (ekki feitar konur samt) og grípa í …… spil.

Nú er 10. nóvember og enn töluvert langt til jóla. Jólalandið í Blómaval í Skútuvogi er samt búið að vera opið í fjórar helgar nú um komandi helgi. Og þá verða ennþá fimm helgar fram að jólum. Auðvitað lá þessi ósköpin öll á að opna Jólalandið. Eftirspurnin var örugglega gríðarleg. Það virðist þó engu skipta fyrir öll jólafólin og skreytingavitleysingana sem eru komnir á kreik nú þegar og keppast við að útþynna hátíðleika jólanna með því að stilla upp glingri og setja seríurnar í samband strax. Eins og þegar ég í ógáti rak nefið inn á Glerártorg í dag og gekk þar nánast í flasið á fullskreyttu jólatré…i. Svei því öllu saman. Það má ekki bíða með þetta í allavega hálfan mánuð í viðbót? Neeiii, auðvitað ekki. Meira að segja mjólkurfernurnar og kókið er komið með áprentaða jólasveina á sig. Þið vitið, sömu jólasveina og byrja að koma til byggða eftir rúman mánuð. Það lá nú aldeilis á að koma þeim á mjólkurfernurnar. Froðuheilar.

Enn hefur ekki tekist að mynda ríkisstjórn hér á landi þrátt fyrir alls kyns samræður manna og kvenna á milli. Vantar myndavél? Til að mynda þarf myndavél til að mynda stjórn. Nja….veit ekki. Kannski er þetta meira þannig að þessi vill ekki vinna með hinum af því að hann er leiðinlegur, þau þarna eru of mikið púkó til að við getum unnið með þeim, þessi er frekur og hinn er vitleysingur. Einhver myndi kalla þetta krísu en ég kýs að kalla þetta „að kanna baklandið“. Ég hef oft reynt að kanna baklandið, bæði mitt og annarra, en lítið orðið ágengt. Þess má til gamans geta að ég get unnið á víðum grundvelli þvert á pólítískar línur og hef afar breiða skírskotun.

En hvað með vinnumarkaðinn? Nú eru allir grunnskólakennarar brjálaðir út af kjararáði. Eða kjaraóráði? Og sjómenn farnir í verkfall. Þingmenn eru margir hverjir brjálaðir út af óumbeðinni launahækkun kjararáðs. Tala nú ekki um forsetann. Og hvað er kjararáð með í laun? Hver ákveður laun kjararáðs? Er kjararáð á prósentum? Er fullt starf að vera í kjararáði? Skiptir engu. Ótengt þessu má nefna að líkjararáð hefur valið Drambuie líkjör besta líkjör ársins 2016.

Óþefur liggur í loftinu
líkar mér ei þetta prump
gæsin er gripin á fluginu
grípur í konurnar Trump.

Kaninn í mylsnu er klofinn
kaus hann svo yfir sig klump
Í vestri er draumurinn dofinn
grípur í dömurnar Trump.

Erfið er staðan og snúin
því forsetinn minnir á strump
bráðum er dásemdin búin
brátt nálgast klofið hann Trump.

Það er rétt að ítreka það sem fram kom í síðustu bloggfærslu að jólin þín byrja ekki í IKEA, þau byrja þegar kviknar í jólageitinni fyrir utan IKEA. Það er ekki nóg að reyna að kveikja í geitinni, hún þarf að brenna til kaldra kola. Koma svo, næst heppnast þetta.

Einar harðskreyttur….eða harðskeyttur.

Tilvitnun dagsins:
Allir: Trump?

Góðir lesendur.

Maðurinn sem reiðir ekki vitið í þverpokum. Maðurinn sem bindur bagga sína ekki sömu hnútum og aðrir. Maðurinn sem gengur ekki heill til skógar. Maðurinn sem teflir iðulega á tvær hættur. Maðurinn sem kastar allri skynsemi fyrir róða. Maðurinn sem lætur aðra finna til tevatnsins. Maðurinn sem veit hvar Davíð keypti ölið. Maðurinn sem allar dauðar lýs detta úr höfðinu á. Maðurinn sem flýtur sofandi að feigðarósi. Maðurinn sem ætti sennilega ekki að fá að halda úti bloggsíðu. Já, þið eruð kannski farin að átta ykkur á þessu.

Það getur verið afar hvimleitt að fá sínu ekki framgengt. Þetta veit ég mætavel – ég fékk því til dæmis ekki framgengt að fá aðstoðarmann til að sjá um að skrifa fyrir mig bloggfærslurnar þegar ég nennti því ekki. Því fór sem fór fyrir þessari síðu. Ég hef ekki þorað að sækja endurnýjað umboð lesenda til að halda áfram með þessa bloggsíðu – því ég veit alveg hvernig það myndi enda.

Það er vægt til orða tekið að segja að væst hafi um ákveðna stjórnmálamenn og stjórnmálaflokka undanfarið. Díses væst. Fréttamenn kjamsa á hverju málinu á fætur öðru, enda stendur til að halda alþingiskosningar í lok mánaðarins. Kjamsi kjamsi kjams. Átök í stjórnmálaflokkum fyrir opnum tjöldum eru eins og tertuhlaðborð fyrir ljósvakamiðla – og það er nóg til handa öllum. SDG vs. SIJ hefur verið fyrsta frétt nú um langt skeið; báðir þeir aðilar kannast eflaust vel við tertuhlaðborð. Af hverju segi ég það? Engin ástæða. Já en hvar á þessi feiti að vera? Í formannssætinu kannski? Veit ekki.

Vonandi tekst duglegu alþingismönnunum okkar að afgreiða öll stóru og mikilvægu málin núna fyrir kosningarnar. Hvaða stóru og mikilvægu mál? Nú málin sem er alltaf verið að tala um á þinginu? Hvaða mál eru það eiginlega? Jú það eru annars vegar starfsáætlun Alþingis og hins vegar fundarstjórn forseta. Vonandi tekst að afgreiða þessi mál nú í vikunni til hagsbóta fyrir almenning í landinu. Ég bíð.

Umtalsverðrar skjálftavirkni hefur orðið vart á mælum Veðurstofu Íslands undanfarna daga. Í fyrstu var talið að skjálftavirknin ætti upptök sín nálægt Kötlu en sérfræðingar hallast nú einna helst að því að um afar öflugan kosningaskjálfta hafi verið að ræða – og við munum víst enn eiga eftir að súpa seyðið af eftirköstunum.

Nú fögnum við átta ára afmæli hinna fleygu orða Geirs Haarde „Guð blessi Ísland“. Í sögubókum framtíðarinnar…eða öllu heldur þegar komandi kynslóðir gúggla þetta þá komast þær að raun um hvers konar vofeiflegir atburðir áttu sér stað í kringum þetta sjónvarpsávarp þáverandi forsætisráðherra. Fjármálakerfið bara spilaborgin ein og búið að hafa landsmenn, já og heiminn allan, að fíflum. Guði sé lof að svona er þetta ekki í dag – allt slétt og fellt og uppi á borðum nú þegar búið er að gera upp hrunið. Emmm….já, segjum það allavega.

Það er merkilegt með svokallaðar raunveruleikastjörnur, þegar raunveruleg vandamál steðja að þá trúir þeim enginn. Talandi um hana Kim okkar Kardashian Íslandsvin með meiru. Raunveruleikastjarnan knáa var rænd á hótelherbergi í París, bundin og kefluð og skilin eftir mörgum skartgripunum fátækari. Fólk er ekki fullt vorkunnsemi vegna þessa, öðru nær. Mörgu fólki virðist þvert á móti bara standa á sama og talar um að þetta hafi verið sviðsett og plat hjá Kim til að fá meiri athygli. Ég leyfi mér að efast, þetta fólk er nú ekki vant öðru en að vera jarðbundið, leysa úr sínum málum án þess að það krefjist mikillar athygli og koma til dyranna eins og það er klætt. Ef það er þá klætt yfir höfuð.

Frammar, Sjallar, Píratar
Þjóðfylking, Dögun og Kratar
Alþýðufylking, Húmanistar
Samfó, Björt Framtíð, VG-atar
Flokkur fólks, Viðreisn, hver platar?

Nei, ég held það gangi aldrei upp að vera með svona pólitískar vísur – þetta eru einfaldlega alltof mörg framboð til þess að þetta geti gengið upp.

Brátt skal kjósa um kosti óljósa
ei ég hrósa stöðunni.
Mun Katla gjósa og sverta ósa?
japlar Rósa á töðunni?

Tjah..pólitískar vísur eða ekki. Þetta verður sennilega aldrei upp á marga fiska.

Þess má til gamans geta að þessi bloggfærsla var rituð án þess að nokkur starfsáætlun þar að lútandi lægi fyrir. Það útskýrir allt þetta málþóf.

Einar yfir marklínuna…….eða ekki.

Tilvitnun dagsins:
Allir: Kjóstu mig!