Kærlegu lesendur.

Já er ekki kominn tími til að láta á sér kræla hér á öldum ljósvakans? Nei, farðu heim til þín aumingi og hættu að trufla okkur. Já fyrirgefið, auðvitað ætti ég að vera löngu farinn heim og búinn að læsa að mér. Og gleypa lykilinn. Hey bíðið nú við, þetta er bloggsíðan mín. Þið getið sjálf bara farið heim til ykkar og læst ykkur inni. Ég ætla að halda áfram mínu striki. Svona. ___________________________
Vá, ekkert smá strik.

Íslenska karlalandsliðið í körfubolta hefur aldeilis látið deigann síga á Evrópukörfuboltamótinu í Finnlandi undanfarna daga. Það hefur verið á brattann að sækja og það hefur hallað undan fæti gegn hverri risastórþjóðinni á fætur annarri. Himnalengjur og langintesar hafa hreinlega troðið okkur undir í samkeppninni og sjálfstraustið er þar af leiðandi frekar lítið sem stendur. Landsmenn hafa engst sundur og saman framan við sjónvarpsskjáinn og setið stjarfir við viðtækin þar sem grátbólgnir íþróttafréttamenn hafa í beinni útsendingu lýst öllu í smáatriðum. Vissulega mun ganga betur hjá okkur næst enda framtíðin björt og margir ungir og efnilegir leikmenn farnir að stíga fram á sjónarsviðið. Þetta var reyndar líka sagt um bloggsíðu Einars Haf fyrir 10 árum síðan og við vitum jú öll hvernig það fór.

Fræga, fallega og ríka fólkið streymdi í viðhafnaropnun H&M tískuvörurisans í Smáralind nýverið. Eins og fram hefur komið hér á bloggsíðunni var mér ekki boðið enda ekki frægur, fallegur og ríkur heldur óþekktur, ljótur og snauður og án viðurkenningar í samfélagi lífstílsbloggara. Þetta er ekki í fyrsta og ekki í síðasta skipti sem ég er sniðgenginn þegar svona viðburðir og mannamót eru annars vegar. Skemmst er að minnast opnunar United Silicon, Perlunnar, McDonalds, Lindex, Hringrásar og Héðinsfjarðarganganna. Aldrei var mér boðið og alltaf var hið svokallaða þotulið handvalið fram yfir mig. Ég mun ná mér niður á öllu þessu liði þó síðar verði.

Það mætti halda að ég væri eitthvað bitur og öfundsjúkur út í allt þetta fólk sem er að gera það svo gott. Svarið er….já auðvitað. Ég er drifinn áfram af öfund og heift og þeir hvatar hafa raunar knúið þessa bloggsíðu áfram allan þennan tíma.

Fjármálaráðherra er samt ekki ráðherra fjármála. Landbúnaðarráðherra er ráðherra fjármála. Þetta kom glögglega í ljós nýverið þegar sá ráðherra boðaði niðurskurð á fé um 20%. Aumingja féð. Þetta er gert í því augnamiði að lækka kjötfjallið svokallaða. Bændur slátra þar af leiðandi fleiri kindum og lömbum nú til að bregðast við 20% niðurskurðarkröfu og það stækkar kjötfjallið. Hmmm…já það er eitthvað þarna sem gengur ekki upp. Fyrirhugaður 20% niðurskurður gæti líka þýtt að í komandi göngum muni gangnamenn ganga 20% minna, skilja 20% meira eftir af fé á fjalli og drekka 20% meira þegar heim er komið. Síðan er haft orð á því að bændum verði borgað fyrir að hætta og mun felast í því töluverður kostnaður en kostnaðurinn yrði reyndar enn meiri ef það ætti að borga bændum fyrir það að hætta að drekka. Þessi miklu lambakjötsvandræði munu vera tilkomin vegna erfiðleika á erlendum mörkuðum og vegna mislukkaðrar markaðssetningar á kjöti. Þetta er afar einkennilegt, sérstaklega í ljósi þess að Einar Haf hefur dásamað sauðkindina og íslenska lambakjötið í hverri einustu áramótahugvekju svo lengi sem elstu menn muna. Ég hef nú þegar, í auglýsingaskyni, boðist til að þýða áramótahugvekjurnar á ensku, kínversku og hebresku án endurgjalds fyrir Markaðsráð kindakjöts en fálega hefur verið tekið í það boð mitt enn sem komið er. Kannski eiga þeir eftir að sjá að sér, bölvaðir.

Samkomuhúsið Höfði í Svarfaðardal er einna þekktast fyrir að hýsa gangnaball Svarfdælinga á hverju hausti. Gangnahelgin rennur senn upp og þá er ekki af sökum að spyrja. Enn á ný er komið að því að hið fornfræga ball fari fram og hverjir standa á bak við þetta allt saman? Það skyldu þó ekki vera Einar Haf og félagar hans í skuggaráðuneyti Höfðans? Svei mér þá. Ég mun sem starfsmaður á balli rukka inn, sem starfsmaður á balli selja fólki sælgæti, sem starfsmaður á balli blanda fyrir það drykki og sem starfsmaður á balli dansa við það gegn vægu gjaldi en siðgæðisvarsla verður að vanda innifalin í aðgöngumiðanum á ballið. Hin goðsagnakennda proggrokk sveit Stulli & Danni mun leika fyrir dansi og kór gangnamanna syngur undir. Verður drukkið undir borðum? Nei það held ég varla, enda búið að ganga frá öllum borðunum í þar til gerðar geymsluskúffur. Óþarfi er að taka það fram að allur þjófnaður í sjoppu Umf. Atla/Umf. Þorsteins Svörfuðar (samstæða) verður kærður til Fella löggu.

Gengnar verða göngur senn
ganga um götur dýr og menn
gangnagaman gleður sál
gangnaliðið segir skál.

Því miður gat ég ekki sett saman fleiri svona gangnavísur hér og nú þar sem ég var búinn með gangnamagnspakkann hjá Símanum. Það gengur bara betur næst. Eða gengst.

Einar í göngum.

ps. GAAAAAAAAAAAAMAAAAAAAAAAAAAAAAANNNNNNNNNNN

Góðu lesendur.

Ég var enn einu sinni búinn að ákveða (að höfðu samráði við hlustendaráð FM957, kjararáð, græna herinn og dómstól götunnar) að láta af störfum sem bloggari og pistlahöfundur en það kom svo í ljós að enn er gríðarleg eftirspurn eftir fræðandi skemmtiefni og skemmtilegu fræðsluefni á öldum ljósvakans. Og hver er betur til þess fallinn að reyna að bera slíkt á borð fyrir lesendur annar en Einar Okkar Hafliðason? Jú eflaust er alveg fullt af fólki sem er betur til þess fallið en Einar en fyrir þennan pening verður þetta bara að duga. Þess má til gamans geta að minnst 20 hlauparar í Reykjavíkurmaraþoninu á morgun munu hlaupa til styrktar því að bloggsíða Einars Haf verði lögð niður….en ég veit að það mun ekki duga þó svo að málefnið sé gott. Ég held þá bara áfram að hlaupa á mig á meðan.

Dónald Trömp Bandaríkjaforseti hefur ekki átt sjö dagana sæla. Það eru reyndar mun fleiri en sjö dagar sem hann hefur ekki átt sæla enda hefur hann farið með hvert málið á fætur öðru út um þúfur. Sífellt fleiri aðstoðarmenn, aðstoðar aðstoðarmenn, fulltrúar og nefndarmenn hrökklast úr starfi eða láta reka sig vegna þess sem forsetinn álpast til að klúðra í starfi. Mun forsetinn hrökklast úr starfi? Munu svín fljúga? Mun Einar hætta að skrifa einhverja þvælu? Einhvern veginn hef ég það á tilfinningunni að ekkert muni breytast.

Sérfræðingar, vísindamenn, minnihlutahópar og málfarsráðunautar hafa sífellt meiri áhyggjur af yfirvofandi alltumlykjandi stafrænum dauða íslenskunnar. Ef ekkert verður að gert mun okkar ástkæra ylhýra tungumál deyja drottni sínum á næstu áratugum þökk sé hinu engilsaxneska snjalltækjatungumáli sem tröllríður öllu og öllum nú til dags og mengar hugi æsku vorrar. Meikar þetta einhvern sens eða splittar þetta ekki diff? Hmm..ég á við, er nokkur vitglóra í þessu eða skiptir þetta engu? Getur tungumálið í alvörunni dáið út? Hvað verður þá um allar bókmenntirnar, bloggfærslurnar, menningararfinn og sérstöðu okkar? Íslendingasögurnar? Um hvað á forsætisráðherra að tala í ávarpinu á Gamlárskvöld? Hvernig munu bloggfærslur mínar hljóma á dönsku, slavnesku eða ensku? Pottþétt afkáralega. Hvað er það að vera afkáralegur? It means to be off Kári-like. Sko, ég held að þetta muni ekki koma til með að ganga upp. Það verður bara að hafa það þó svo að bloggsíða Einars Haf verði sú síðasta sinnar tegundar á íslensku þegar fram líða stundir. Það skilur hvort eð er enginn neitt í þessum bloggfærslum þó þær séu á íslensku.

Og hvers á vesalings Alfreð Gíslason að gjalda þegar íslenskan verður útdauð? Hvað mun honum finnast um það að heita Totally frozen son of a hostage? Þetta mál hefur greinilega ekki verið hugsað til enda.

Bóklestur hefur dregist saman um u.þ.b. 50% síðustu örfáu ár samkvæmt fréttum. Sem sagt, fólk sem las alla bókina fyrir 10 árum les bara hálfa bókina núna og gefst þá upp. Allt er þetta tengt því sem minnst var á hér á undan og snýr að væntanlegum útdauða tungumálsins. Það tollir enginn orðið við bóklestur því það eru allir uppteknir í snjalltækjunum – alltaf. Meira að segja núna eru lesendur bloggsíðunnar í tölvunni og snjallsímanum sínum á sama tíma. Enginn er maður með mönnum nema vera í símanum undir stýri og svo eru símar í dag meira að segja orðnir vatnsheldir þannig að nú er hægt að fara í sund eða heitan pott án þess að missa nokkuð úr. Ég þarf auðvitað ekkert að vera að stagglast svona á þessu endalaust, þið sáuð þetta allt á facebook, snapchat, twitter og instagram fyrr í kvöld.

Væri ekki ráð að taka upp léttara hjal? Jú auðvitað, það væri ekki vitlaust. Til dæmis má greina frá því að nú er óheyrilega stutt í að H&M verslanakeðjan geðþekka og vinsæla opni nýja og æðisgengna verslun á höfuðborgarsvæðinu. Íslendingar hafa iðað í kreditkortinu og skinninu (skinninu sem er undir fötunum sem keypt voru í H&M síðast þegar farið var til útlanda) allar götur síðan tilkynnt var með formlegum hætti að opnun H&M á Íslandi yrði að veruleika. Menn velta því fyrir sér hvaða áhrif þetta gæti haft á hérlendan fatamarkað sbr. þau áhrif sem Costco hafði á smásölumarkaðinn. Helstu áhrifin verða væntanlega þau að fólk mun þurfa að upphugsa nýjar ástæður fyrir því að ferðast til útlanda ef það verður framvegis nóg að fara í Smáralind til að komast í H&M. Annars held ég að ekkert breytist. Auðvitað munu Íslendingar eftir sem áður gera sitt besta við að styðja við enn eitt erlenda stórfyrirtækið sem aumkar sér yfir hnýpna þjóð á hjara veraldar og opnar búð. Auðvitað munu Íslendingar styðja við erlendan iðnað eins og við höfum gert svo margoft áður. Auðvitað ætlum við að slá öll met og standa í biðröð marga klukkutíma áður en búðin opnar í fyrsta skipti svo við missum örugglega ekki af neinu. Auðvitað. Það verður vonandi gott netsamband þarna á svæðinu svo það verði hægt að hanga í snjallsímanum meðan beðið er eftir að opni. Ekki þurfa þó allir að naga þröskuldinn því helstu lífstílsbloggarar landsins og aðrir meðlimir í þotuliðinu fá að mæta í sérstaka merkikertaopnun tveimur dögum á undan almenningi. Enn og aftur er lífstílsbloggarinn Einar Haf skilinn út undan í svona löguðu, bara vegna þess að hans lífstíll samræmist ekki lífstíl góða og réttláta fólksins. Algjörlega dæmigert. Til þess að bíta hausinn af skömminni er boðskortið fyrir merkikertin á ensku. Það var svo sem auðvitað. Kærar þakkir H&M (Hlandhausar&Merkikerti) fyrir að leggja ykkar lóð á vogarskálarnar við að útdeyða íslenskuna. Takk.

Já ég er brjálaður. Það eina sem gæti kætt mig núna væri að forsalan á JólaBó myndi opna hið snarasta.

Ég reyni hvað ég get að lifa lýtalausu lífi
lífstíl reyni að temja mér sem aðrir telja’að blífi,
fyrir helgi heilbrigði og hollustu ég fíla
…en eftir helgi ligg ég undir bekk og borða stíla.

Þess má til gamans geta að þeir félagar Gylfi Sig og Borgar Sig eru ekkert skyldir…..eða hvað?

Alone Son of a seamember.

Tilvitnun dagsins:
Allir: SÍMINN!!!

Sælu lesendur.

Það er svo sannarlega brjálað stuð hér á bloggsíðu Einars Haf og það ekki í fyrsta skipti. Lesendur fá aldeilis eitthvað fyrir sinn snúð og þeir geta reyndar fengið á snúðinn líka ef svo ber undir. Lesendur eru minntir á að mynda einfalda röð til að skrifa athugasemdir – ekki viljum við að athugasemdakerfið stíflist vegna óþarfa álags. Þess má til gamans geta að fimmtíu fyrstu sem gera læk verða örugglega blautir í fæturnar, nema þeir séu á góðum stígvélum.

Nokkuð hefur borið á saurgerlamengun upp á síðkastið. Lengi vel var talið að mengunin ætti upptök sín á bloggsíðu Einars Haf af augljósum ástæðum. Sérfræðingar telja sig þó hafa útilokað þann möguleika þar sem allur skíturinn sem Einar Haf hafi sett á netið gegnum tíðina sé enn á bloggsíðunni að stærstum hluta og hafi ekki lekið út í haf, nema þá Einar Haf. Það verður bara að hafa það þó svo að lesendur vaði aurinn á bloggsíðu Einars Haf upp að hnjám. Höfuðborgarbúar urðu auðvitað ævareiðir þegar uppgötvaðist að 100% hreint skólp blandað dömubindum, túrtöppum og eyrnapinnum hafði flætt út í sjó svo dögum skipti. Persónulega var mér skítsama en ég hef reyndar alltaf verið hrifinn af hreinum viðbjóð, þ.e.a.s. þegar viðbjóðurinn kemur á mann hreinn og ómengaður beint af skepnunni….eða úr skepnunni.

Evrópumeistaramót kvenna í knattspyrnu stendur nú yfir í Hollandi. Ísland tók þátt á mótinu og ljóst var strax í upphafi að liðið ætlaði sér stóra hluti. Kveðjuathöfnin í Keflavík var tilfinningaþrungin og nú skyldi leggja Evrópu að fótum sér. Því miður gleymdist að segja hinum liðunum frá þessu, allir leikir Íslands töpuðust og við komuna aftur til Íslands var liðið grýtt af almenningi og skammað af forsetanum…..nei kannski ekki alveg. Stelpurnar okkar reyndu hvað þær gátu en dómararnir „okkar“, óheppni og höfðatala urðu til þess að dæmið gekk ekki upp að þessu sinni. Það gengur bara betur næst.

Gunnar Okkar Nelson varð fyrir hrottalegri líkamsárás nýverið og ekki nóg með það heldur var árásin sýnd í beinni sjónvarpsútsendingu til milljóna manna um allan heim. Fyrst var potað í augun á Gunnari og síðan var hann kýldur í rot. Líkamsárás á borð við þessa, oftast kölluð UFC af fagmönnum, er að vísu ekkert ný af nálinni fyrir Gunnar Okkar og sennilega fékk hann eitthvað greitt fyrir þetta líka. Svo að enginn misskilji íþróttina þá má sem sagt ekki pota í augun á fólki en það má lemja það fast í höfuðið ítrekað og valda þannig hugsanlega óbætanlegum heilaskaða. Iss piss.

Verslunarmannahelgin er nú yfirvofandi eina ferðina enn. Til stóð að koma eins mörgum til Vestmannaeyja fyrir helgina og mögulegt er en yfirvöld eru ekki á sama máli og reyna hvað þau geta að torvelda samgöngur milli blands og peyja….hmmm, ég átti við milli lands og eyja. Það er kannski eins gott að Samgöngustofa var ekki til þegar eldgosið hófst í Vestmannaeyjum þarna um árið og flytja þurfti alla íbúana burt í snarhasti – þá hefði enginn komist neitt nema á löglega vottuðu farþegaskipi. Ef fram heldur sem horfir mun hluti dagskrár Þjóðhátíðar fara fram á bílastæðinu við Landeyjarhöfn – það ætti ekki að koma að sök ef það man einhver eftir því að fara í ríkið fyrst. Heill hellingur af öðrum hátíðum fer fram um komandi helgi, það er örugglega óþarfi að ég fari að þylja þetta allt upp eina ferðina enn (hinir fjölmörgu aðdáendur bloggsíðu Einars Haf kannast við þetta allt saman). Æludagar í Hörgársveit, Ein með pjöllu á Akureyri, Inníkúkinn í Reykjavík og svínarí í Ölskyldu- og Búsdýragarðinum eru bara nokkur dæmi og ég ætla ekki að fara nánar út í það.

Að gefnu tilefni er rétt að taka það fram að það er bannað að auglýsa kjóla í þingsal en hins vegar er ekkert sem bannar það að blóta og ragna í þingsal. Raunar er það tekið fram í siðareglum þingmanna að þingmenn megi ekkert gera í þingsalnum sem gæti gagnast þeim persónulega eða almenningi yfir höfuð. Hmm…kannski las ég þessar reglur ekki alveg rétt.

Nú er þingið fullt af flónum
flý ég senn í skjól.
Bjarni er í síðum buxum
Björt í bláum kjól.

Gleðileg jól. Eða verslunarmannahelgi.

Þess má til gamans geta að engin erlend skemmtiferðaskip komu við á þessari bloggsíðu á leið sinni til landsins, þrátt fyrir gylliboð Einars Haf.

Einar einar.

Tilvitnun dagsins:
Allir: LÍFIÐ ER YNDISLEGT….Í LANDEYJARHÖFN!!!

Góðu lesendur.

Það er svo sannarlega á brattann að sækja í þessari bloggfærslu. Af hverju segi ég það? Nú auðvitað af því að mannvitsbrekkan er svo brött. Hún er varla kleif. Það breytir því þó ekki að Einar Haf rembist eins og túristi við póstkassa við að færa lesendum sínum allt það ferskasta og svalasta úr heimi bloggfærslugerðar – en þar hefur reyndar ekkert ferskt og svalt komið fram í 10 ár.

Sauðburður stendur nú yfir til sveita, að minnsta kosti þar sem eru kindur. Af hverju er verið að bera sauðina? Nú, ekki bera þeir sig sjálfir. Á Urðum hafa nokkrar ær borið og eitthvað hefur borið á því að gemlingar hafi borið. Þær ær sem ekki hafa borið hafa borið því við að hafa ekki notið holdlegs samneytis hrútanna um jólaleytið – sem er jú grunnforsenda þess að lömbin komi í heiminn að vori.

Söngvakeppni evrópskra sjónvarpsstöðva fer fram í Úkraínu nú á laugardaginn. Íslendingar hugðust taka þátt með laginu um pappírinn og höfðu í því skyni eytt gríðarlega miklum tíma og peningum í kynningar, förðun, ljós, búninga, glimmer, bakraddir og vindvélar. Lagasmíðarnar sátu kannski aðeins á hakanum en það verður ekki á allt kosið. Til þess að fá að syngja með þurftu Íslendingar að láta kjósa sig áfram úr 18 laga undanriðli en henni Svölu okkar varð því miður ekki kápan úr því klæðinu. Eftir að þessi sáru vonbrigði urðu ljós hefur dómstóll götunnar leitað skýringa. Talað er um baktjaldamakk austantjaldsþjóða, það er að segja makk bakvið austantjaldið. Svo er líka talað um að framlag okkar hafi einfaldlega ekki náð að skera sig úr fjöldanum og fallið í skuggann af öðrum alveg jafn óspennandi engilsaxneskum framlögum annarra þjóða. Eflaust má setja út á klæðaburð Svölu en eins og átti eftir að koma í ljós síðar ruku aðrar söngkonur áfram úr undanriðlinum mun minna klæddar en Svala okkar. Þar lá hundurinn kannski grafinn. Aðalatriðið er auðvitað að vera með…..í aðalkeppninni. Klúður. Síðan þessi úrslit voru gerð heyrum kunnug hef ég lokað mig af, grátið og verið með lagið „Það sem enginn sér“ í samfelldri spilun.

Auðvitað áttum við að senda einhvern minnihlutahóp til keppni í Eurovision þetta árið. Það hefur margoft sýnt sig að aumingjadýrkun og vorkunnsemi getur skilað fólki langt. Hefðum við sent falskan síamsblökkudverg til leiks með forníslenskar rímur hefðum við flogið áfram. Það væri ekki verra ef viðkomandi væri dauðvona – það er ekki hægt annað en að kjósa svoleiðis atriði áfram.

Vestmannaeyingar hafa nú skorað á yfirvöld að draga Vestmannaeyjar nær landi en nú er til að auðvelda Eyjamönnum að skreppa í land þegar hentar og fara í bæinn og þess háttar. Það sé algjörlega óviðunandi að Vestmannaeyingar þurfi að dúsa fastir heima hjá sér í Vestmannaeyjum dögum og vikum saman þegar þeir gætu verið að spóka sig á meginlandinu. Það er kannski bara mitt vandamál en ég á erfitt með að finna til samkenndar með íbúum suðrænnar aflandseyju sem þessarar. Þeir geta bara verið rólegir heima í skattaskjólinu sínu.

Lögreglan í Reykjavík telur að vændiskonum hér á landi hafi fjölgað gríðarlega undanfarin misseri. Það má selja vændi en ekki kaupa það. Sem er fullkomlega rökrétt. Fjör í vændum er auðvitað fylgifiskur góðærisins og einnig fylgifiskur ferðamannanna – því þeir flytja jú allan andskotann með sér til landsins. Pylsur, niðursoðin skinka, skordýr, kýlapest, saur, vændiskonur. Allt þetta og meira til leynist í pokum og pinklum þeirra milljóna ferðamanna sem heimsækja okkur. Á ekkert að gera í þessu? Jú auðvitað, það á að hækka virðisaukaskattinn og lækka hann svo aðeins aftur. Þetta mun að öllum líkindum ganga af ferðamannaiðnaðinum dauðum enda hafa borist fréttir af því að 8.500 manns hafi afbókað sig nú þegar árið 2018. Ó minn auman – og ég sem ætlaði að lifa áhyggjulaus til æviloka, þökk sé ferðamönnunum.

Nú ætlar hún Vilborg okkar Gissurardóttir sér að klífa hæsta tind heims, Mount okkar Everest. Flott hjá henni. Eða er það? Er eitthvað flott við það að eyða fúlgum fjár í það eytt að klifra upp og niður eitthvað fjall og leggja sig í stórkostlega lífshættu? Og er þetta eitthvað merkilegt? Það eru jú serparnir sem sjá um allt þetta erfiða eins og að vísa veginn og halda á farangrinum. Í ofanálag hefur ferðamönnum á Everestfjalli fjölgað gríðarlega síðustu mánuði. Nepölsk yfirvöld eru í miklum vandræðum vegna almenns aðstöðuleysis og skorts á salernisaðstöðu. Grunnbúðirnar eru orðnar að Lundabúðum og salernispappírinn nálægt toppnum er upp í ökkla.

Ég sá það í símanum mínum áðan að símanotkun nútímamanna sé orðin að viðurkenndu samfélagslegu vandamáli. Ég tók skjáskot af fréttinni, póstaði á instagram og sendi inn til landlæknisembættisins með myllumerkinu #þjóðarmein – en þannig kemst ég í pott sem dregið verður úr bráðlega og hægt verður að vinna fjölda spennandi vinninga á borð við spaldhryggsmeðferð, afvötnun og detox.

Baltasar Kormákur er þessa dagana með Ófærð II í bígerð. Þessi nýja framhaldsþáttaröð mun ekki fjalla um ófæra heiði eða ófært bæjarfélag heldur ófært bókhald bloggsíðu Einars Haf – og hausverkinn sem bíður bókhaldara og endurskoðenda sem að málinu koma. Í alvöru? Nei bara grín. Nýja ófærðin verður auðvitað stafræn ófærð þar sem allt síma- og netsamband í afskekktu sjávarþorpi fellur niður og fólk neyðist til þess að tala hvort við annað augliti til auglitis dögum og vikum saman. Ekki langar mig að horfa á þann hrylling.

Talandi um að slá í gegn….

Kjósendur um álfu alla
áfram kjósa konur, kalla
kemst ég áfram, fer ég heim?
Kjósi þeir ekki Svölu skalla
mun og skjóta eflaust alla
Dabbi Gren, hann kálar þeim.

Þess má geta að á sjötta tug ferðamanna dvelja nú í fjöldahjálparstöð á Suðurlandi eingöngu vegna slæmrar útreiðar í þessari bloggfærslu.

Einar í 16. sæti.

Tilvitnun dagsins:
Allir: JÚRÓ!!!

Vorglöðu lesendur.

Gleðilegt sumar og takk fyrir veturinn. Þetta hefur verið langur og tregafullur vetur hvað viðkemur bloggsíðu Einars Haf. Að vísu er erfitt að sjá árstíðamun á þeirri „ágætu“ síðu en það er annað mál. Vetur og sumar frusu saman á eftirminnilegan hátt og nú verður spennandi að sjá hvað kemur út úr því. Kannski útkoman verði sú sama og þegar góðæri og hrun frusu saman hér um árið – hver veit?

Í dag má ekkert. Það má ekki fara í sund án þess að vera undir eftirliti – þú gætir drukknað. Það má ekki hækka virðisaukaskatt á ferðaþjónustu – þá gæti ferðamannaiðnaðurinn farið á hausinn. Það má ekki starfrækja kísilverksmiðju – hún gæti drepið almenning úr mengun. Það má ekki kalla mann feitabollu, feitalíus eða hlussu – þá ertu að leggja alla minnihlutahópa í einelti með hatursorðræðu og svívirðingum. Epalhomminn þinn. Svona var þetta ekki í eina tíð. Þá mátti gera alla þessa hluti. Þá mátti fólk fara sér að voða. Þá mátti hjóla hjálmlaus og þá mátti reykja í flugvélum. Þá var meira að segja til þjóðþekkt persóna sem hét Bjössi bolla og heitir reyndar enn – hver man ekki eftir Bjössa fituhjassa? Ef þessi persóna kæmi fram á sjónarsviðið í dag yrði sennilega að kalla hana Bjössa Íturvaxna eða Bjössa Stórbeinótta til þess að móðga nú engan og koma inn ranghugmyndum hjá börnunum. Varla viljum við að börnin verði haldin ranghugmyndum? Gleymum ekki að öll börn eru þau fallegustu sem fæðst hafa og allir eru prinsar og prinsessur og gullmolar. Það eru engar ranghugmyndir.

Menn hafa nú af því stöðugt meiri áhyggjur að íslensk tunga sé við það að deyja svokölluðum stafrænum dauða. Hið engilsaxneska útrúnkaða snjalltækjaorðfæri æsku dagsins mun ef að líkum lætur ganga af einu merkilegasta tungumáli sem fyrirfinnst dauðu áður en langt um líður, verði ekki gripið í taumana. Ég horfði á sjónvarpsþátt um daginn í hinu íslenska Ríkissjónvarpi þar sem fjallað var um lögin í söngvakeppni evrópskra sjónvarpsstöðva (júgravísíjón) og mér hreinlega blöskraði. Kalla ég þó ekki allt ömmu mína. Ég þekki að vísu fáa sem kalla allt ömmu sína en það er aukaatriði. Í þessum þætti voru orð látin falla á borð við að fakttékka, innspíra, vókalísera, improvæsa, performa og svo var talað um að vera ákústískur. Á kústi þá? Hvað í dauða djöflinum á þetta að þýða eiginlega? Ég er að verða pínu improvæstur út af þessu.

Ég hef íhugað það alvarlega undanfarna daga að gerast lífsstílsbloggari en það þykir móðins nú á dögum. Þegar ég var búinn að hugsa um þetta í smástund mundi ég allt í einu eftir því að ég fæ sjittlód af kass sand af seðlum fyrir að skrifa hverja færslu hvort sem er – en það fyndna er að ég fæ enn meira greitt fyrir að skrifa ekki neitt. Hvernig gæti nú staðið á því?

Sauðburður hefst nú von bráðar og er það vel. Að beiðni kjötiðnaðarstöðva og smásala verða hryggir og læri fóðruð í sumarhaganum til haustsins en frampörtum og slögum má farga strax – enda selst slíkt ekki bofs. Já ég sagði bofs. Afkoma sauðfjárbænda verður eflaust í brennidepli þegar líða fer á sumarið en hvað sem því líður mun sauðkindin halda í okkur lífinu eftir sem áður – þó henni takist varla að halda lífinu í sauðfjárbændum. Það hefur ekkert breyst, allir sem lesið hafa áramótahugvekjur Einars Haf vita þetta.

Nú nýverið sendi ríkisstjórn Íslands frá sér skrýtlu- og brandarahefti sem ætlað er að lyfta brún almennings og kallast Fjármálaáætlun Íslands til næstu fimm ára. Í þessu skemmtilega hefti sem frændurnir Bjarni og Benedikt hafa tekið saman kemur meðal annars fram að það eigi að stórauka kyrrstöðu og óbreytt framlög til heilbrigðismála sem standa jafnvel meira í stað en árið áður. Það á að slá skjaldborg um niðurskurð á sjúkrahúsum og það á að byggja nýjan spítala fyrir afganginn sem verður af Vaðlaheiðargöngunum. Stefnt er að því að halda áfram að vega að vegakerfinu þar til allir vegakaflar sem fyrirfinnast verða orðnir endanlega útkeyrðir. Fjármálaáætlunin gerir ráð fyrir að efnahagslegum stöðugleika verði viðhaldið með hjálp eldri borgara – en sparifé þeirra hefur reynst ómetanlegt í endurreisn Íslands síðustu misseri.

Peningar af skammti skornum
skemma fyrir vorri þjóð.
Ferðast ég á slóðum fornum
frekar þunnt er þetta ljóð.

Í næstu bloggfærslu mun lyfstílsbloggarinn Einar Haf segja frá því nýjasta á sviði lyfstíla og annarra heilbrigðistengdra mála.

Einar styrktur í bak og fyrir.

Tilvitnun dagsins:
Allir: FITUFORDÓMAR!!!